„...án bókmenntauppeldis verða engir lesendur í framtíðinni“.
„Lesum sögur því þær gefa fyrirmynd að hugsandi, tilfinningaríkum verum sem bregðast við fjölbreyttum aðstæðum og atburðum“.
Markmið námskeiðsins er að styðja við þátttakendur, þeirra námssamfélög og teymi í að vinna á innihaldsríkan og skapandi hátt með bókmenntir í kennslu. Lögð verður áhersla á að koma auga á og nýta tækifæri sem felast í bókmenntum. Horft verður til samþættingar námsgreina og hvernig samræður um efni bóka geta dýpkað skilning nemenda á umfjöllunarefni og aðstæðum. Í námskeiðinu verður leitast við að efla áhuga og virkni nemenda á lestri góðra bókmennta og notkun tungumálsins, hvetja þá til að nýta styrkleika sína á fjölbreyttan hátt og styðja þá við að velja sér lesefni við hæfi. Lögð verður áhersla á fjölbreyttar leiðir til tjáningar, nýtingu tækni til náms, samræðu nemenda og val um aðferðir við skapandi skil.
Skráningarfrestur er til og með 1. september 2023
Á námskeiðinu læra þátttakendur að nýta þróunarhring (sjá mynd neðar) í fjórum skrefum, sem styður við samtal um innleiðingu breyttra starfshátta í námi og kennslu. Skrefin fjögur eru stigin í skólanum, á milli kennslulota í Menntafléttunni:
Skref A: Þátttakendur undirbúa sig með lestri eða áhorfi – og undirbúa spurningar.
Skref B: Þátttakendur funda með teyminu sínu og gera áætlun um útfærslu í starfi.
Skref C: Þátttakendur og teymið þeirra framkvæmir og skrá hjá sér athuganir.
Skref D: Þátttakendur funda aftur með teyminu og ræða hvernig til tókst og hvernig nemendurnir brugðust við.
Við lok námskeiðs geta þátttakendur
- Leitt samtöl um breytta starfshætti í námssamfélögum og teymum í skólum og á vinnustöðum.
- Nýtt og tileiknað sér nýjar aðferðir við notkun bókmennta í kennslu.
- Notað samræður sem markvissa kennsluaðferð í samþættu námi.
- Nýtt aðferðir sem ýta undir áhuga og sjálfstæði nemenda í lestri.
- Þróað leiðir sem hvetja nemendur til fjölbreyttrar vinnu og skapandi skila.
Fyrir hverja er námskeiðið og hvaða skilyrði þurfa að vera til staðar?
Námskeiðið er fyrir kennara sem kenna í 7.–10. bekk grunnskóla. Reynslan hefur sýnt fram á að farsælt sé að fleiri en einn þátttakandi sé frá hverjum skóla, en það er þó ekki skilyrði.
Eindregið er hvatt til þess að þátttakendur séu í samráði við sína stjórnendur um þátttöku á námskeiðinu. Með því eru stjórnendur meðvitaðir um og samábyrgir um að styðja við þróun námssamfélaga innan sinna stofnana. Hér er myndband sem lýsir mikilvægu hlutverki stjórnenda sem eiga þátttakendur á Menntafléttunámskeiðum og hér er texti sem lýsir þeim skilyrðum sem verða að vera til staðar í skóla þar sem námssamfélög kennara blómstra.
Hvar og hvernig fer námskeiðið fram?
Kennslan fer fram í sex lotum á ZOOM, þrjár klukkustundir að lengd, skólaárið 2023-2024. Nám þátttakenda fer þó aðallega fram í skólum þátttakenda í samtali teyma um þróun náms og kennslu. Þátttakendur fá hagnýtar kveikjur í lotunum sem þeir geta fléttað saman við daglegt starf, þeir leiða svo samtal á teymisfundum um hvernig gengur. Í upphafi hverrar kennslulotu er farið yfir reynslu þátttakenda af því að nýta þróunarhringinn frá síðustu lotu.
Dag- og tímasetningar lota
2023
Mánudagur, 18. september kl. 14.15–17.00
Fimmtudagur, 2. nóvember kl. 14.15–17.00
Fimmtudagur, 30. nóvember kl. 14.15–17.00
2024
Fimmtudagur, 11. janúar kl. 14.15–17.00
Fimmtudagur, 8. febrúar kl. 14.15–17.00
Fimmtudagur, 14. mars kl. 14.15–17.00
Umsjón og kennsla
Álfhildur Leifsdóttir, grunnskólakennari í Árskóla og Apple Distinguished Educator, Brynhildur Sigurðardóttir, grunnskólakennari í Stapaskóla og Brynhildur Þórarinsdóttir, rithöfundur og dósent í barnabókmenntum við Háskólann á Akureyri.
Myndin sem fylgir námskeiðslýsingu er sjálfsmynd Álfhildar Leifsdóttur, innblásin af bókinni Undur eftir R. J. Palacio.
Þróunarhringurinn
Þróunarhringurinn er úr smiðju Skolverket í Svíþjóð og nýttur með góðfúslegu leyfi.
Í hnotskurn
- Lotur 6
- Quizzes 0
- Lotur: 6x3 klst.
- Hefst: All levels
- Lýkur: Mars 2024
- Gjöld: 1
- Gjöld: Mismunandi
-
1. lota / Lesum saman
Í fyrstu lotu námskeiðsins kynnast þátttakendur hver öðum, kynnast hugmyndafræði námskeiðsins og ræða saman um hvernig þeir geta þróað og stutt við námssamfélagið í eigin skóla. Efni lotunnar verður kynnt og skoðað hvað skiptir máli þegar lesið er með og fyrir börn og unglinga. Rætt verður um mikilvæga þætti þegar velja á bækur fyrir og með nemendum og hvernig hægt er að kynna bækur til leiks til að efla áhuga og virkni nemenda.
-
2. lota / Tækifærin í bókmenntunum
Í lotunni verður rætt um hvað skiptir máli við val á bókum sem höfða til nemenda og auka við reynslu þeirra og skilning á eigin aðstæðum og annarra. Skoðað verður hvernig efni bókanna gefur möguleika til samþættingar og skapandi skila. Kennarar námskeiðsins kynna fjölbreytt efni sem fyrir liggur og leiða þátttakendur í gegn um samræður um hvernig hægt er að hagnýta það í kennslu. Einnig verður rætt um mikilvægi þess að gefa nemendum kost á að velja bækur til að lesa og vinna með í ljósi áhuga þeirra og sjálfstæðis í námi.
-
3. lota / Undrið
Í lotunni verður sérstaklega hugað að samræðum sem leið í kennslu og undirbúningi fyrir skapandi skil. Í lotunni verður einnig kafað ofan í söguna Undur eftir R.J. Palacio. Farið verður í gerð kennsluáætlana þar sem samþætting og skapandi skil eru í brennidepli. Þátttakendur velja eina skapandi leið og æfa á heimavelli ásamt því að lesa valda bók sem verður tekin verður til umfjöllunar í janúarlotunni.
-
4. lota / Bókin, að skapa og skilja
Í þessari lotu æfa þátttakendur sig í gerð kennsluáætlunar þar sem áherslan er á samþættingu og skapandi skil. Þátttakendur vinna saman og deila sín á milli. Kennsluáætlanir nýttar með nemendum á heimavelli.
-
5. lota / Bókin og möguleikar tækninnar
Í lotunni verður sérstaklega hugað að þeim möguleikum sem tæknin býður upp á í sköpun og skilum, innan og milli skóla. Tæknilaunir skoðaðar og notkun æfð. Haldið áfram að skoða og ræða góðar bókmenntir og hvernig má nýta þær til að efla skólastarf.
-
6. lota / Bókmenntir og skapandi skil, samantekt og uppskera
Í síðustu lotu námskeiðsins ræða þátttakendur reynslu sína og kynna hver fyrir öðrum vel heppnð viðfangsefni vetrarins ásamt því að horfa til framtíðar.
