„Segðu mér og ég gleymi – sýndu mér og ég man – leyfðu mér að reyna og ég skil“.
Markmið námskeiðsins er að styðja við þátttakendur, þeirra námssamfélög og teymi við að auka þekkingu á fjölbreytileika í taugaþroska nemenda og hvernig hægt er að stuðla að nemendamiðaðri nálgun í skólastarfi.
Börn mæta í skólann með ólíkt veganesti og mismikla hæfni til að takast á við veruleikann sem mætir þeim þar. Á námskeiðinu verður sjónum beint að því hvernig mögulegt er að stuðla að farsæld allra barna í skólastarfi með því að skapa jafnvægi milli einstaklingsmiðaðs stuðnings og viðeigandi aðlögunar umhverfis. Skoðað verður hvernig hægt er að greina hvenær þörf fyrir aðlögun og stuðning er vegna sérstakra þarfa einstaklingsins og hvenær þörfin fyrir stuðning og aðlögun er vegna kerfislægra hindrana í samfélaginu.
Sameiginleg sýn og skilningur er forsenda þess að barni líði vel í skóla og að þörfum þess sé mætt. Á námskeiðinu verður farið í leiðir sem nýtast við að horfa undir yfirborðið og átta sig á rót vanda og koma auga á leiðir til lausna.
Á námskeiðinu læra þátttakendur að nýta þróunarhring (sjá mynd neðar) í fjórum skrefum, sem styður við samtal um innleiðingu breyttra starfshátta í námi og kennslu. Skrefin fjögur eru stigin í grunnskólanum, á milli kennslulota í Menntafléttunni:
Skref A: Þátttakendur undirbúa sig með lestri eða áhorfi – og undirbúa spurningar.
Skref B: Þátttakendur funda með teyminu sínu og gera áætlun um útfærslu í starfi.
Skref C: Þátttakendur og teymið þeirra framkvæmir og skrá hjá sér athuganir.
Skref D: Þátttakendur funda aftur með teyminu og ræða hvernig til tókst og hvernig börnin og unglingarnir brugðust við.
Við lok námskeiðs geta þátttakendur
- leitt samtöl um breytta starfshætti í námssamfélögum og teymum í grunnskólum.
- gert grein fyrir fjölbreytileika í taugaþroska og áhrifum á lærdómsferli nemenda.
- gert sér grein fyrir mikilvægi áhugahvatar fyrir námsferlið og virkni í námi.
- beitt og séð tilgang með hagnýtum verkfærum við aðlögun náms og umhverfis.
- nýtt aðferðir og aukið hæfni sína til að mæta ólíkum þörfum nemenda.
Fyrir hverja er námskeiðið og hvaða skilyrði þurfa að vera til staðar?
Námskeiðið er fyrir kennara, sérkennara og annað fagmenntað starfsfólk í stoðþjónustu grunnskóla. Reynslan hefur sýnt fram á að farsælt sé að fleiri en einn þátttakandi sé frá hverjum skóla, en það er þó ekki skilyrði.
Eindregið er hvatt til þess að þátttakendur séu í samráði við sína stjórnendur um þátttöku á námskeiðinu. Með því eru stjórnendur meðvitaðir um og samábyrgir um að styðja við þróun námssamfélaga innan sinna stofnana. Hér er myndband sem lýsir mikilvægu hlutverki stjórnenda sem eiga þátttakendur á Menntafléttunámskeiðum og hér er texti sem lýsir þeim skilyrðum sem verða að vera til staðar í skóla þar sem námssamfélög blómstra.
Hvar og hvernig fer námskeiðið fram?
Kennslan fer fram í sex lotum á ZOOM, sem eru þrjár klukkustundir að lengd, skólaárið 2022–2023. Nám þátttakenda fer þó aðallega fram í skólum þátttakenda í samtali teyma um þróun náms og kennslu. Þátttakendur fá hagnýtar kveikjur í lotunum sem þeir geta fléttað saman við daglegt starf, þeir leiða svo samtal á teymisfundum um hvernig gengur.
Í upphafi hverrar kennslulotu er farið yfir reynslu þátttakenda af því að nýta þróunarhringinn frá síðustu lotu.
Dag- og tímasetningar lota
2022
Mánudagur, 12. september kl. 14.00–17.00
Mánudagur, 10. október kl. 14.00–17.00
Mánudagur, 21. nóvember kl. 14.00–17.00
2023
Mánudagur, 16. janúar kl. 14.00–17.00
Mánudagur, 6. mars kl. 14.00–17.00
Mánudagur, 8. maí kl. 14.00–17.00
Umsjón og kennsla
Áslaug Melax, einhverfu- og sérkennluráðgjafi í skólaþjónustu Akureyrar, Helga Vilhjálmsdóttir, sálfræðingur og forstöðumaður skólaþjónustu Akureyrar og Kristín Björk Jóhannsdóttir, ráðgjafi hjá skólaþjónustu og verkefnastjóri í farsældarteymi fjölskyldusviðs Árborgar.
Þróunarhringurinn
Þróunarhringurinn er úr smiðju Skolverket og nýttur með góðfúslegu leyfi.
Í hnotskurn
- Lotur 6
- Quizzes 0
- Lotur: 6x3 klst.
- Hefst: All levels
- Lýkur: Maí 2023
- Gjöld: 0
- Gjöld: Mismunandi
-
1. lota / Umvefjandi skólasamfélag: Sameiginleg sýn og skilningur
Í fyrstu lotu námskeiðsins kynnast þátttakendur hver öðum, kynnast hugmyndafræði námskeiðsins og ræða saman um hvernig þeir geta þróað og stutt við námssamfélagið í sínum skóla. Í lotunni verður efni námskeiðsins kynnt og rætt og sérstaklega skoðað hvernig efla má sameiginlega sýn og skilning á fjölbreyttum þörfum nemenda.
-
2. lota / Hvað er undir yfirborðinu? Börn gera vel ef þau geta
Lotan hefst á því að þátttakendur bera saman reynslu sína og ræða hvernig til tókst að máta efni fyrstu lotu við eigin starfsvettvang. Fókusinn er svo settur á hvernig má lesa í, skrá og bregðast við þörfum nemenda og verður meðal annars litið til kenninga Dr. Ross Green um færni og vanda.
-
3. lota / Um hvað snýst aðlögun náms og umhverfis? Framkvæmdafærni nemenda í brennidepli
Í þriðju lotu er viðfangsefnið aðlögun náms og umhverfis til að styðja við framkvæmdafærni nemenda. Skoðaðar verða leiðir sem miða að því að auka áhuga, þátttöku og sjálfstæði nemenda í námi. Þátttakendur ræða saman um hagnýtingu aðferða á heimavelli.
-
4. lota / Hugarfarið og áhugahvöt: Traust og virðing
Í fjórðu lotu verður haldið áfram, tengt við fyrra efni námskeiðsins og fókusinn settur á mikilvægi áhugahvatar í námi. Rætt verður um mikilvægi þess að þekkja til og nýta áhugasvið nemenda og ræddar leiðir til að kveikja og viðhalda áhuga.
-
5. lota / Skapandi skóli: Nemendamiðað nám
Í lotunni verður skoðað hvernig viðhorf, skipulag og starfshættir spila saman í skólastarfinu. Þátttakendur halda áfram að tengja efni námskeiðs við eigin starfsvettvang og skoða möguleika og sóknarfæri.
-
6. lota Fjölbreytileiki og farsæld í skólastarfi: Samantekt og kynningar á uppskeru vetrarstarfsins
Í síðustu lotu námskeiðsins ræða þátttakendur reynslu sína og kynna hver fyrir öðrum vel heppnuð viðfangsefni vetrarins.
