Forysta um nám og styðjandi menningu

Markmið námskeiðsins er að styðja við þátttakendur, þeirra námssamfélög og stjórnunarteymi við þróun forystu til náms. Markmið námskeiðsins er að efla starfsþróun skólastjórnenda og viðfangsefnin eru valin með hliðsjón af niðurstöðum menntarannsókna á veruleika og aðstæðum íslenskra skólastjórnenda. 

Þátttakendur fá stuðning og hvatningu til að þróa starfshætti sem stuðla að forystu um nám og leiðsögn í lærdómssamfélagi. Rýnt verður í leiðir til forystu um nám og leiðsögn og skoðað hvernig aðstæður og menning er samofin starfsþróun og námi á vettvangi. Skólastjórnendur greina eigin hugmyndir, reynslu og starfskenningu og velja í kjölfarið þá þætti sem þeir vilja vinna með á námskeiðinu.  

Jafningjaleiðsögn þátttakenda er lykilþáttur námskeiðsins. Þar taka stjórnendur mið af eigin reynslu af forystu, stjórnun og leiðsögn. Námskeiðið verður tengt starfi stjórnenda m.a. með stuðningi við að gera starfendarannsókn á eigin starfi á vettvangi. 

Skráningarfrestur er t.o.m. 26. ágúst.

Á námskeiðinu læra þátttakendur að nýta þróunarhring (sjá mynd neðar) í fjórum skrefum, sem styður við samtal um innleiðingu breyttra starfshátta í námi og kennslu. Skrefin fjögur eru stigin í skólanum, á milli kennslulota í Menntafléttunni: 

Skref A: Þátttakendur undirbúa sig með lestri eða áhorfi – og undirbúa spurningar.
Skref B: Þátttakendur funda með teyminu sínu og gera áætlun um útfærslu í starfi.
Skref C: Þátttakendur og teymið þeirra framkvæmir og skrá hjá sér athuganir.
Skref D: Þátttakendur funda aftur með teyminu og ræða hvernig til tókst.

Við lok námskeiðs geta þátttakendur

• leitt samtöl um breytta starfshætti í námssamfélögum og teymum í skólum.
• skilið tengsl menntaforystu, leiðsagnar og lærdómssamfélags. 
• nýtt aðferðir menntaforystu sem hafa að markmiði að efla starfsþróun.  
• beitt völdum aðferðum menntaforystu á ígrundaðan og gagnrýninn hátt í ljósi fræða, rannsókna, eigin starfskenningar og reynslu. 
• nýtt hornsteina CRM-líkansins í umbótastarfi og stuðningi við lærdómssamfélög.  

Fyrir hverja er námskeiðið og hvaða skilyrði þurfa að vera til staðar?  

Námskeiðið er fyrir stjórnendur í leikskóla, grunnskóla og frmahldsskóla.  Reynslan hefur sýnt fram á að farsælt sé að fleiri en einn þátttakandi sé frá hverjum skóla, en það er þó ekki skilyrði.  

Hvar og hvernig fer námskeiðið fram?  

Kennslan fer fram í sex lotum, þrjár klukkustundir að lengd, skólaárið 2022–2023 á ZOOM. Nám þátttakenda fer þó aðallega fram í skólum þeirra, í samtali teyma um þróun náms og kennslu. Þátttakendur fá hagnýtar kveikjur í lotunum sem þeir – og teymin þeirra geta fléttað saman við daglegt starf.  Í upphafi hverrar kennslulotu er farið yfir reynslu þátttakenda af því að nýta þróunarhringinn frá síðustu lotu. 

Dag- og tímasetningar lota

2022
Þriðjudagur, 20. september kl. 12:30–15:30
Þriðjudagur, 25. október kl. 12:30–15:30
Þriðjudagur, 22. nóvember kl. 12:30–15:30
2023
Þriðjudagur, 17. janúar kl. 12:30–15:30
Þriðjudagur, 28. febrúar kl. 12:30–15:30
Þriðjudagur, 18. apríl kl. 12:30–15:30

Umsjón og kennsla

Ingileif Ástvaldsdóttir, aðjúnkt við Menntavísindasvið Háskóla Íslands auk gestakennara úr Háskóla Íslands, Háskólanum á Akureyri og af vettvangi.

Þróunarhringurinn

Þróunarhringurinn er úr smiðju Skolverket í Svíþjóð og nýttur með góðfúslegu leyfi.