Höfum áhrif: Menntun til sjálfbærni á unglingastigi

Skráningu er lokið á námskeiðið. Upp úr áramótum verður námskeiðsframboð Menntafléttu fyrir skólaárið 2022-2023 kynnt.

Markmið námskeiðsins er að styrkja leiðtoga á unglingastigi við að leiða hóp samkennara sinna í  námssamfélagi með samræðum um menntun til sjálfbærni. Lögð verður áhersla á að styðja þátttakendur í að beita gagnrýnum og umbreytandi kennsluháttum sem verka bæði valdeflandi á þá og nemendur þeirra. Leiðarljós námskeiðsins eru að þátttakendur geti leitt þverfagleg verkefni sem taka á áskorunum samtímans og framtíðarinnar. Þátttakendur kynnast ólíkum hliðum sjálfbærni þar sem lögð verður áhersla á skapandi grenndarnám, borgaravitund og hagnýta nálgun sem þátttakendur geta nýtt beint í eigið starf. Þátttakendur munu m.a. vinna saman í teymum að hugmyndavinnu og gerð kennsluáætlana með verkfærum sem virkja samstarfsfólk og nemendur.

Við lok námskeiðs geta þátttakendur

• Gegnt hlutverki leiðtoga og leitt námssamfélög jafningja í eigin skóla með samtali, endurgjöf og ígrundun um breytta starfshætti
• Undirbúið þverfagleg verkefni á sviði sjálfbærni
• Skipulagt skapandi kennslu sem tekur á álitamálum líðandi stundar
• Beitt valdeflandi nemendamiðuðum kennsluaðferðum sem leiða til getu til aðgerða
• Rætt og miðlað ólíkum hliðum sjálfbærni og möguleikum umbreytandi náms
• Ígrundað skipulag, kennslu og framfarir skólasamfélagsins á sviði sjálfbærni

Fyrir hverja er námskeiðið og hvernig fer skráning fram?

Námskeiðið er fyrir kennara á unglingastigi grunnskóla sem kenna ólíkar námsgreinar í 7. –10. bekk. List- og verkgreinakennarar eru sérstaklega hvattir til þátttöku. Mælt er með því að hver skóli hafi tvo leiðtoga á námskeiðinu en það er þó ekki skilyrði fyrir þátttöku. Hvatt er til samstarfs milli leiðtoga úr ólíkum skólum, sem ýmist gæti verið innan nærsamfélags skólanna, innan sama sveitarfélags, svæðis og/eða hverfis eða landshorna á milli.

Mikilvægt er að þátttakendur séu mótttækilegir fyrir því að þróa eða prófa þverfagleg verkefni með nemendum sínum á námskeiðstímabilinu.

Hvatt er til þess að þátttakendur sammælist um skráningu við sína stjórnendur. Þannig er tryggður nauðsynlegur stuðningur við viðfangsefni námskeiðsins og þróun námssamfélags á hverjum stað.

Skráning hefst 17. maí 2021.

Hvar og hvernig fer námskeiðið fram?

Námskeiðið fer fram rafrænt í sex lotum, þrjár klukkustundir að lengd, skólaárið 2021-2022. Skoðað verður með þátttakendum hvort tækifæri gefist á staðlotum. Á milli lota vinna þátttakendur með hagnýtar kveikjur námskeiðsins í hópi samstarfsfólks og flétta þannig viðfangsefnin við daglegt starf. Í upphafi hverrar lotu er farið yfir reynslu leiðtoga af starfinu í skólunum. 

Dag- og tímasetningar lotanna eru:

2021
Mánudagur 30. ágúst kl. 14-17
Mánudagur 20. september kl. 14-17
Mánudagur 8. nóvember kl. 14-17
2022
Mánudagur 17. janúar kl. 14-17
Mánudagur 14. mars kl. 14-17
Mánudagur 16. maí kl. 14-17.

Reikna má með því að leiðtogarnir verji um 50 klukkustundum í heildina yfir veturinn vegna námskeiðsins, í bæði námslotur sem og stuðning við þróun námssamfélaga á hverjum stað. Þeir kennarar sem taka þátt í samtali og þróun breyttra starfshátta geta reiknað með að verja um 25 klukkustundum yfir veturinn.

Mynd í námskeiðslýsingu: Bára Hulda Beck.

Þróunarhringurinn

Á milli lota styðjast leiðtogar við þessi fjögur skref þróunarhrings, með samkennurum og samstarfsfólki. Þróunarhringurinn er úr smiðju Skolverket í Svíþjóð og nýttur með góðfúslegu leyfi.