„Þetta er ekki oj! Þetta er dýr!“
Markmið námskeiðsins er að styðja við þátttakendur, þeirra námssamfélög og teymi í að vinna að verkefnum sem byggja á Vidubiology- verkefninu þar sem nemendur eru virkjaðir til að taka myndir og búa til myndbönd og nota þau til að rannsaka og læra um náttúruna á áhugaverðan og skemmtilegan hátt. Reynslan sýnir að grunnhugmynd Vidubiology nýtist einnig vel í öðrum námsgreinum.
Á námskeiðinu verður unnið með gagnlegar hugmyndir og leiðir að því hvernig nýta má myndvinnslu og aðra stafræna tækni í útinámi og náttúrufræðikennslu í grunnskólum.
Unnið verður með tækni eins og ljósmyndasögur, hikmyndir, hrað- og hægspilun til að auðga náttúrufræðikennslu barna og ungmenna á öllum árstíðum. Þátttakendur fá dæmi um þemu sem þeir geta unnið með nemendum og eru í samræmi við hæfniviðmið aðalnámskrár. Verkefnin byggja á því að kveikja og efla áhuga á náttúrunni þar sem nemendur vinna með margmiðlunartækni um leið og þeir læra um tiltekin fyrirbæri náttúrunnar. Sérstaklega verður fjallað um gagnsemi stafrænnar tækni og miðla við rannsókna- og uppgötvunarnám.
Skráningarfrestur er t.o.m. 26. ágúst.
Á námskeiðinu læra þátttakendur að nýta þróunarhring (sjá mynd neðar) í fjórum skrefum, sem styður við samtal um innleiðingu breyttra starfshátta í námi og kennslu. Skrefin fjögur eru stigin í skólanum, á milli kennslulota í Menntafléttunni:
Skref A: Þátttakendur undirbúa sig með lestri eða áhorfi – og undirbúa spurningar.
Skref B: Þátttakendur funda með teyminu sínu og gera áætlun um útfærslu í starfi.
Skref C: Þátttakendur og teymið þeirra framkvæmir og skráir hjá sér athuganir.
Skref D: Þátttakendur funda aftur með teyminu og ræða hvernig til tókst og hvernig nemendurnir brugðust við.
Við lok námskeiðs geta þátttakendur
- leitt samtöl um breytta starfshætti í námssamfélögum og teymum í skólum.
- notað ýmsar gerðir forrita og tækja við myndatökur og myndvinnslu.
- skipulagt kennslu þar sem nemendur vinna með myndatökur og gerð myndskeiða.
- notað nærumhverfið til að kenna um náttúruna á öllum árstíðum.
Fyrir hverja er námskeiðið og hvaða skilyrði þurfa að vera til staðar?
Námskeiðið er fyrir kennara sem kenna náttúrufræði á öllum stigum grunnskólans.
Eindregið er hvatt til þess að þátttakendur séu í samráði við sína stjórnendur um þátttöku á námskeiðinu. Með því eru stjórnendur meðvitaðir um og samábyrgir um að styðja við þróun námssamfélaga innan sinna stofnana. Hér er myndband sem lýsir mikilvægu hlutverki stjórnenda sem eiga þátttakendur á Menntafléttunámskeiðum og hér er texti sem lýsir þeim skilyrðum sem verða að vera til staðar í skóla þar sem námssamfélög kennara blómstra.
Hvar og hvernig fer námskeiðið fram?
Kennslan fer fram í sex lotum, þrjár klukkustundir að lengd, skólaárið 2022-2023 á ZOOM. Nám þátttakenda fer þó aðallega fram í skólum þátttakenda í samtali teyma um þróun náms og kennslu. Þátttakendur fá hagnýtar kveikjur í lotunum sem þeir – og teymin þeirra geta fléttað saman við daglegt skólastarf.
Í upphafi hverrar kennslulotu er farið yfir reynslu þátttakenda af því að nýta þróunarhringinn frá síðustu lotu.
Dag- og tímasetningar lota
2022
Mánudagur, 29. ágúst kl.13.00-16.00
Mánudagur, 7. nóvember kl. 13.00–16.00
2023
Mánudagur, 23. janúar kl. 13.00–16.00
Mánudagur, 20. mars kl. 13.00-16.00
Mánudagur, 24. apríl kl. 13.00-16.00
Mánudagur, 8. maí kl. 13.00–16.00
Þróunarhringurinn
Þróunarhringurinn er úr smiðju Skolverket í Svíþjóð og nýttur með góðfúslegu leyfi.
Umsjón og kennsla
Brynhildur Bjarnadóttir, dósent við Háskólann á Akureyri, Edda Elísabet Magnúsdóttir, lektor við Háskóla Íslands, Svava Pétursdóttir, lektor við Háskóla Íslands, auk gestakennara.
Í hnotskurn
- Lotur 6
- Quizzes 0
- Lotur: 6x3 klst.
- Hefst: All levels
- Lýkur: Maí 2023
- Gjöld: 0
- Gjöld: Mismunandi
-
1. lota / Náttúran í gegnum linsuna: Smásögur úr náttúrunni
Kynning á viðfangsefni námskeiðsins og umræður um möguleg þemu. Unnið með ljósmyndir til að fanga viðfangsefni í náttúrunni. Farið yfir geymslu og vistun mynda. Áhersla lögð á haustið og viðfangsefni þess.
-
2. lota / Að uppgötva og læra með tækninni
Hagnýt ráð og reynslusögur kennara úr Vidubiologi-verkefninu. Rætt um samþættingu leitarnáms og stafrænnar tækni.
-
3. lota / Veturinn: Smásögur úr náttúrunni
Vinnustofa I þar sem unnið er með myndmiðlun og myndvinnslu. Áhersla lögð á veturinn og viðfangsefni sem tilheyra honum.
-
4. lota / Skapandi fræðslumyndbönd
Vinnustofa II þar sem unnið er með myndbönd, hreyfimyndir og grænskjái í smáforritum og tölvum.
-
5. lota / Vorið: Smásögur úr náttúrunni
Unnið með ýmsa tækni, svo sem hikmyndir, hrað- og hægspilun og ljósmyndasögur til að sýna hringrásir í vistkerfum. Áhersla lögð á vorið og viðfangsefni sem tilheyra því.
-
6. lota / Náttúran í gegnum linsuna: samantekt
Í þessari síðustu lotu námskeiðsins munum við fara yfir viðfangsefni lotanna og skoða það sem stóð upp úr hjá þátttakendum og jafnframt velta fyrir okkur hver næstu skref verða hjá þátttakendum og þeirra námssamfélagi. Þátttakendur kynna afurðir námskeiðsins og miðla hagnýtum ráðum varðandi skapandi myndmiðlun í náttúrunni.
