„Mér hefur þótt námskeiðið mjög áhugavert, það hefur opnað augu mín fyrir svo margvíslegum leiðum í vinnu með leikskólabörnum“.
Markmið námskeiðsins er að styðja við þátttakendur, námssamfélög þeirra og teymi í að vinna með stærðfræði í umhverfi leikskólabarna. Þetta námskeið er sjálfstætt framhald af námskeiðinu Stærðfræðin í leik barna. Á námskeiðinu skoðum við hvernig stærðfræðilegu viðfangsefnin að staðsetja og hanna gefa börnum tækifæri til þess að skilja og hlutbinda rýmið í kringum sig. Í dæmunum sem eru gefin er skoðað hvernig leikur getur haft áhrif á nám í leikskóla. Ólíkar hugmyndir um leikgleði barna verða skoðaðar og hvernig við bregðumst við þeim. Kennslufræðileg áhersla beinist að þátttöku leikskólakennarans í starfi barna. Aðaláherslan er á að nálgast stærðfræðileg viðfangsefni í gegnum staðsetningu og hönnun.
Skráningarfrestur er t.o.m. 26. ágúst.
Á námskeiðinu læra þátttakendur að nýta þróunarhring (sjá mynd neðar) í fjórum skrefum, sem styður við samræður um innleiðingu breyttra starfshátta í námi og kennslu. Skrefin fjögur eru stigin í skólanum, á milli kennslulota í Menntafléttunni:
Skref A: Þátttakendur undirbúa sig með lestri eða áhorfi – og undirbúa spurningar.
Skref B: Þátttakendur funda með teymi sínu og gera áætlun um útfærslu í starfi.
Skref C: Þátttakendur og teymi þeirra framkvæmir og skrá hjá sér athuganir.
Skref D: Þátttakendur funda aftur með teyminu og ræða hvernig til tókst og hvernig börnin brugðust við.
Námskeiðið byggir á efni frá sænsku menntamálastofnuninni Skolverket með góðfúslegu leyfi þeirra.
Við lok námskeiðs hafa þátttakendur kynnst
- leiðum til að efla námssamfélag sitt með umræðum um hvernig leikskólabörn vinna með stærðfræði í umhverfinu.
- lesefni og hugmyndum að viðfangsefnum tengdum stærðfræði í umhverfi leikskólabarna með samstarfsfólki.
- hugtökum tengd staðsetningu og hönnun í starfi með leikskólabörnum.
- því hvernig má styðja við leikskólabörn til að vinna með staðsetningu í rými og hönnun.
Fyrir hverja er námskeiðið og hvaða skilyrði þurfa að vera til staðar?
Námskeiðið er fyrir leikskólakennara og starfsfólk leikskóla. Reynslan hefur sýnt fram á að farsælt sé að fleiri en einn þátttakandi sé frá hverjum leikskóla, en það er þó ekki skilyrði.
Eindregið er hvatt til þess að þátttakendur skrái sig í samráði við stjórnendur sína um þátttöku á námskeiðinu. Það tryggir að stjórnendur séu meðvitaðir um og samábyrgir fyrir að styðja við þróun námssamfélaga innan stofnana sinna. Hér er myndband sem lýsir mikilvægu hlutverki stjórnenda sem eiga þátttakendur á Menntafléttunámskeiðum og hér er texti sem lýsir þeim skilyrðum sem verða að vera til staðar í leikskóla þar sem námssamfélög leikskólakennara blómstra.
Hvar og hvernig fer námskeiðið fram?
Kennslan fer fram í sex lotum, þrjár klukkustundir að lengd, skólaárið 2022-2023 á Menntavísindasviði Háskóla Íslands og með fjarfundabúnaði. Nám þátttakenda fer þó aðallega fram í leikskólum þátttakenda í samræðum teyma um þróun náms og kennslu. Þátttakendur fá hagnýtar kveikjur í lotunum sem þeir geta fléttað saman við daglegt starf, þeir leiða svo samtal á teymisfundum um hvernig gengur.
Í upphafi hverrar kennslulotu er farið yfir reynslu þátttakenda af því að nýta þróunarhringinn frá síðustu lotu.
Dag- og tímasetningar lota
2022
Fimmtudagur, 6. október kl. 9.00–12.00
Þriðjudagur, 1. nóvember kl. 9.00–12.00
Miðvikudagur, 30. nóvember kl. 9.00–12.00
2023
Mánudagur, 23. janúar kl. 9.00–12.00
Föstudagur, 10. mars kl. 9.00–12.00
Miðvikudagur, 3. maí kl. 9.00–12.00
Þróunarhringurinn
Þróunarhringurinn er úr smiðju Skolverket í Svíþjóð og nýttur með góðfúslegu leyfi.
Umsjón og kennsla
Jónína Vala Kristinsdóttir, dósent í stærðfræðimenntun og Margrét S. Björnsdóttir, aðjúnkt, báðar við Menntavísindasvið Háskóla Íslands og Valdís Ingimarsdóttir, leikskólakennari.
Í hnotskurn
- Lotur 6
- Quizzes 0
- Lotur: 6x3 klst.
- Hefst: All levels
- Lýkur: Maí 2023
- Gjöld: 0
- Gjöld: Mismunandi
-
1. lota / Stærðfræðin í umhverfi leikskólabarna
Í fyrstu lotu námskeiðsins er farið yfir skipulag og efni námskeiðsins í grófum dráttum. Þátttakendur vinna verkefni sem varðar efni námskeiðsins. Rætt verður um hugtakið námssamfélag og hvað felst í því. Einnig verður rætt um hvað felst í því að vera leiðtogi meðal jafningja. Þátttakendur skoða Canvas vefinn saman og kynnast þróunarhringnum.
-
2. lota / Þróunarhringur 1 - Skipulagning rýmis
Í þessum þróunarhring er skoðað hvernig stærðfræðilegu viðfangsefnin að hanna og staðsetja gefa börnum tækifæri til þess að skilja og hlutbinda rýmið í kringum sig. Gefin eru dæmi um hvernig stærðfræðileg viðfangsefni geta verið í forgrunni þegar leikskólakennarinn tekur þátt í kennslu þar sem markmið barnanna er að leysa vandamál eða þraut. Markmið þessa þróunarhrings er að gefa yfirsýn yfir þau stærðfræðilegu viðfangsefni sem Bishop nefndi að staðsetja og hanna.
-
3. lota / Þróunarhringur 2 - Að staðsetja
Stærðfræðilega viðfangsefnið að staðsetja fjallar um það hvernig börn skilja og tjá staðsetningu á þeim sjálfum og hlutum í samhengi við umhverfið. Tjáningin getur hvort sem er verið með orðum eða athöfnum. Kynntar verða hugmyndir Bishops um stærðfræðilega viðfangsefnið að staðsetja sem fjallar um það að rannsaka og staðsetja sig í rými og umhverfi. Markmið þessa þróunarhrings er að leggja áherslu á stærðfræðilega viðfangsefnið að staðsetja.
-
4. lota / Þróunarhringur 3 - Hönnun
Stærðfræðilega viðfangsefnið að hanna fjallar um það að skoða og breyta formi og tilgangi hluta. Hönnunarferli hefst með hugmynd um hvernig ákveðinn hlutur eigi að nýtast eða virka. Markmið þessa þróunarhrings er að leggja áherslu á hvers vegna það að hanna er stærðfræðilegt viðfangsefni og hvernig það gefur tækifæri til þess að greina, tjá, rannsaka og nota form
-
5. lota / Þróunarhringur 4 - Skráning og eftirfylgni
Í þessum þróunarhring skoðum við aftur hlutverk skráningar í leikskólanum. Í þetta sinn er lögð áhersla á hvernig hægt er að skrá þátttöku barna í stærðfræðilegum viðfangsefnum til að ögra tilgátum-í-athöfn. Gefnar eru vísbendingar um hvað börn vita og geta með tilliti til stærðfræðilegu viðfangsefnanna að leika, útskýra, staðsetja og hanna. Markmið þessa þróunarhrings er að leggja áherslu á hlutverk skráningar fyrir undirbúning leikskólakennarans og þeirra námstækifæra sem hann skipuleggur.
-
6. lota / Lokafundur og samantekt
Þátttakendur segja frá hvernig gekk að vinna með efni síðasta þróunarhrings 4 í skólunum. Litið verður yfir farin veg og skoðað hvernig vinna vetrarins gekk í skólunum og draga fram það sem vel var gert. Síðan verður litið fram á veginn og þátttakendur ígrunda hver verða næstu skref hjá þeim og þeirra námssamfélögum.
