„Námskeiðið hefur haldið utan um umræðuna og sett hana í ákveðinn farveg sem ekki hefði orðið til á annan hátt”
Markmið námskeiðsins er að styðja við þátttakendur, námssamfélög þeirra og teymi í að efla þekkingu sína á og hæfni í umræðum um þróun talna- og aðgerðaskilnings barna. Unnið verður með hugmyndir um Stærðfræðikennslu byggða á skilningi barna. Einkenni ólíkra þrautagerða í samlagningu, frádrætti, margföldun og deilingu verða skoðuð. Greindar verða lausnaleiðir barna sem fram koma í glímu þeirra við ólíkar þrautir og þær skoðaðar með tilliti til inntaks og kennsluhátta. Á námskeiðinu er stuðst við efni úr bókinni Childrens Mathematics – Cognitively Guided Instruction. Miðað er við að kennarar leggi þrautir fyrir nemendur sína og greini lausnir þeirra á grundvelli efnis námskeiðsins. Í umræðum eru bæði skoðaðar íslenskar upptökur af börnum sem glíma við þrautir og reynsla kennara rædd í ljósi lesefnis og myndefnis.
Skráningarfrestur er t.o.m. 26. ágúst.
Á námskeiðinu læra þátttakendur að nýta þróunarhring (sjá mynd neðar) í fjórum skrefum, sem styður við samræður um innleiðingu breyttra starfshátta í námi og kennslu. Skrefin fjögur eru stigin í skólanum, á milli kennslulota í Menntafléttunni:
Skref A: Þátttakendur undirbúa sig með lestri eða áhorfi – og undirbúa spurningar.
Skref B: Þátttakendur funda með teymi sínu og gera áætlun um útfærslu í starfi.
Skref C: Þátttakendur og teymi þeirra framkvæmir og skrá hjá sér athuganir.
Skref D: Þátttakendur funda aftur með teyminu og ræða hvernig til tókst og hvernig nemendur brugðust við.
Við lok námskeiðs hafa þátttakendur kynnst
- leiðum til að efla námssamfélag sitt með umræðum um þróun stærðfræðikennslu.
- lesefni og myndefni um þróun talna- og aðgerðaskilnings barna.
- ólíkum þrautagerðum í samlagningu, frádrætti, margföldun og deilingu.
- því hvernig greina má aðgerðaskilning barna út frá lausnaleiðum þeirra.
Fyrir hverja er námskeiðið og hvaða skilyrði þurfa að vera til staðar?
Námskeiðið er fyrir kennara á yngsta stigi grunnskóla. Reynslan hefur sýnt fram á að farsælt sé að fleiri en einn þátttakandi sé frá hverjum skóla en það er þó ekki skilyrði.
Eindregið er hvatt til þess að þátttakendur skrái sig í samráði við stjórnendur sína um þátttöku á námskeiðinu. Það tryggir að stjórnendur séu meðvitaðir um og samábyrgir fyrir að styðja við þróun námssamfélaga innan stofnana sinna. Hér er myndband sem lýsir mikilvægu hlutverki stjórnenda sem eiga þátttakendur á Menntafléttunámskeiðum og hér er texti sem lýsir þeim skilyrðum sem verða að vera til staðar í skóla þar sem námssamfélög kennara blómstra.
Hvar og hvernig fer námskeiðið fram?
Kennslan fer fram í sex rafrænum lotum, þrjár klukkustundir að lengd, skólaárið 2023-2024. Kennarar hafa hug á að vera með eina sex klukkustunda staðlotu í stað tveggja lota á vef á tímabilinu 15.-19. janúar. Nánari tímasetning staðlotunnar verður ákveðin í samráði við þátttakendur. Nám þátttakenda fer þó aðallega fram í skólum þátttakenda í samræðum teyma um þróun náms og kennslu. Þátttakendur fá hagnýtar kveikjur í lotunum sem þeir geta fléttað saman við daglegt starf. Þeir leiða svo samtal á teymisfundum í sínum skólum um hvernig gengur.
Í upphafi hverrar kennslulotu er farið yfir reynslu þátttakenda af því að nýta þróunarhringinn frá síðustu lotu (sjá mynd af þróunarhringnum hér fyrir neðan).
Dagsetningar lotanna
2023
Fimmtudagur, 7. september kl. 14.00-17.00
Fimmtudagur, 28. september kl. 14.00-17.00
Fimmtudagur, 9. nóvember kl. 14.00-17.00
2023
Fimmtudagur, 11. janúar kl. 14.00-17.00
Fimmtudagur, 29. febrúar kl. 14.00-17.00
Fimmtudagur, 2. maí kl. 14.00-17.00
Kennsla fer fram á fjarfundum og í einni staðlotu.
Þróunarhringurinn
Þróunarhringurinn er sóttur í smiðju Skolverket og nýttur með góðfúslegu leyfi.
Umsjón og kennsla
Auður Lilja Harðardóttir kennari við Ísaksskóla, Salóme Halldórsdóttir leikskólastjóri í Glaðheimum og Jónína Vala Kristinsdóttir dósent við Menntavísindsvið Háskóla Íslands.
Í hnotskurn
- Lotur 6
- Quizzes 0
- Lotur: 6x3 klst.
- Hefst: All levels
- Lýkur: Maí 2024
- Gjöld: 0
- Gjöld: Mismunandi
-
1. lota / Grunnhugmyndir sem stærðfræðikennsla bygð á skilningi barna hvílir á. Hlutverk leiðtoga og stuðningur við þróun námssamfélaga
Í fyrstu lotu námskeiðsins er farið yfir skipulag og efni námskeiðsins í grófum dráttum. Þátttakendur vinna verkefni sem varðar efni námskeiðsins. Rætt verður um hugtakið námssamfélag og hvað felst í því. Einnig verður rætt um hvað felst í því að vera leiðtogi meðal jafningja. Þátttakendur skoða Canvas vefinn saman og kynnast þróunarhringnum
-
2. lota / Þróunarhringur 1 - Þrautir tengdar samlagningu og frádrætti
Í þessum fyrsta þróunarhring er lögð áhersla á að kennarar læri að þekkja fjóra grunnflokka þrauta sem tengjast samlagningu og frádrætti og hvernig börn skilja þær. Mikilvægt er að kennarar þekki muninn á ólíkum tegundum þrauta og geti valið þraut sem hentar að vinna með nemendum á ólíkum tímum. Kennarar þurfa líka að öðlast öryggi í að semja sjálfir þrautir af mismunandi gerð.
-
3. lota / Þróunarhringur 2 - Lausnaleiðir í samlagningu og frádrætti
Í þróunarhring 2 er fjallað um lausnaleiðir sem nemendur nota til að leysa samlagningar- og frádráttardæmi sem fjallað var um í fyrsta þróunarhring. Skoðað er hvernig lausnaferli nemenda þróast með aukinni reynslu og þekkingu þeirra. Sjónum er líka beint að þeim upplýsingum sem kennarar geta fengið um talnaskilning nemenda sinna með því að skoða lausnaleiðir þeirra.
-
4. lota / Þróunarhringur 3 - Margföldun og deiling: Þrautagerðir og lausnaleiðir
Í þróunarhring 3 er fengist við þrautagerðir um margföldun og deilingu og hvernig nemendur takast á við þær. Þrautum tengdar margföldun og deilingu er hægt að skipta í þrjá flokka og er mikilvægt að kennarar þekki muninn á þeim.
-
5. lota / Þróunarhringur 4 - Tugakerfið og reikningur með háum tölum
Í þróunarhring 4 er er unnið með þrautir með fjölstafa tölum. Skoðað er hvernig nemendur nálgast verkefnin og lausnaleiðir þeirra skoðaðar og greindar. Áhersla er lögð á mikilvægi þess að styðja nemendur við að þróa reiknirit sín og styrkja talna- og aðgerðaskilning sinn. Einnig er talað um leiðir til að hvetja nemendur til að tjá sig um lausnaleiðir sínar og þróa skráningu á þeim
-
6. lota / Samantekt og umræður um næstu skref í námssamfélögunum í skólunum
Þátttakendur segja frá hvernig gekk að vinna með efni síðasta þróunarhrings (nr. 4) í skólunum. Litið verður yfir farin veg og skoðað hvernig vinna vetrarins gekk í skólunum og draga fram það sem vel var gert. Síðan verður litið fram á veginn og þátttakendur ígrunda hver verða næstu skref hjá þeim og þeirra námssamfélögum.
