Á vef Menntamiðjunnar er miðlað óformlegri starfsþróun sem sprettur upp úr grasrót faghópa í menntakerfinu en einnig formlegri starfsþróun sem opinberir- og einkaðilar bjóða upp á. Með óformlegri starfsþróun er átt við torg utan um ýmis viðfangsefni, menntabúðir, hópa á samfélagsmiðlum og fjölmenn og fámenn teymi kennara og fagfólks sem blómstra um land allt. Jafnframt er að finna á vefnum greinargott yfirlit yfir útgáfu og hlaðvörp sem geta nýst starfsfólki og yfirlit yfir styrktarsjóði.
Að Menntamiðju standa Mennta- og barnamálaráðuneytið, Menntavísindasvið Háskóla Íslands, Skóla- og frístundasvið Reykjavíkurborgar, Kennarasamband Íslands, Samband íslenskra sveitarfélaga, Miðstöð menntunar og skólaþróunar, Háskólinn á Akureyri, Háskólinn í Reykjavík og Listaháskóli Íslands.
Markmið Menntamiðju er að vera gátt að starfsþróun kennara, stjórnenda og annars starfsfólks í menntakerfinu. Á vef okkar má finna yfirlit námskeiða, viðburða, styrkja, FB samfélaga, hlaðvarpa og annað sem getur nýst öllu starfsfólki í skóla- og frístundastarfi.
Ekkert eiginlegt efni er á síðunni heldur er einungis vísað í tengla hjá öðrum aðilum. Því ber Menntamiðja ekki ábyrgð á að upplýsingar á viðkomandi síðum séu réttar.
Hérna getur allir sent inn ábendingar um námskeið, viðburði ofl. sem gæti átt heima hér. Ritstjóri fer yfir og birtir á síðunni ef ábending verður samþykkt.
Menntamiðja spratt upp árið 2012 sem samstarfsvettvangur stofnana og hópa innan skólasamfélagsins. Menntamiðjan gegndi því hlutverki að vera umgjörð samstarfsfélaga þar sem framsækin grasrótarverkefni blómstruðu. Fjölbreytt torg héldu utan um ólík viðfangsefni kennara og skólafólks og Menntamiðja stóð fyrir viðburðum, deildi þekkingu, var brú milli fræða og framkvæmda og skóp samfélag um skólastarf.
NýMennt á Menntavísindasviði Háskóla Íslands hefur séð um verkefnisstjórn Menntamiðjunnar frá árinu 2022.
Stýrihópur og ritstjórn Menntamiðju eru skipuð fulltrúum allra eigenda Menntamiðju. Ritstjórn tekur afstöðu til efnis sem miðlað er á vefnum.
