Íslenskuþorp í leikskólum um land allt

Námskeiðið er fyrir starfsfólk leikskóla sem hefur annað móðurmál en íslensku. Á námskeiðinu verður fléttað saman fagtengdri íslenskukennslu og 8 fjölbreyttum þemum úr leikskólastarfi. Námskeiðið byggir á samtali þátttakenda, uppbyggingu tengslanets og samstarfi þátttakenda og mentora innan leikskólanna. Þátttakendur, mentorar þeirra og leikskólastjórar kynnast menningarnæmi og fjölmenningarlegum áherslum leikskólastarfs og fá tækifæri til að byggja upp þekkingu innan leikskólanna á ofangreindu til framtíðar. 

Umsjónarkennari námskeiðsins er Guðlaug Stella Brynjólfsdóttir, forstöðumaður Íslenskuþorpsins. Aðferðafræði Íslenskuþorpsins býður upp á markvisst og sérsniðið æfingaumhverfi í raunverulegum aðstæðum þar sem umhverfið og stuðningur mentors styður við námið og samskipti á íslensku. Guðlaug mun leita leiða til að heimsækja þátttakendur og mentora á vinnutíma leikskólanna með fræðslu og handleiðslu til að tryggja eftirfylgd og aðlögun námskeiðsins að þörfum þátttakenda. 

Við lok námskeiðs hafa þátttakendur

• eflt hæfni sína í fagtengdri íslensku í leikskóla, bæði með ígrundun og samtali.
  
• kynnst 8 ólíkum þemum leikskólastarfs með áherslu á ný hugtök og hvernig þau koma fyrir í leikskólastarfi.
• eignast tengslanet í leikskólum víða um land og kynnst fjölbreyttu leikskólastarfi þátttakenda sem og gestakennara.
• byggt upp, ásamt mentorum sínum, þekkingu innan sinna leikskóla á menningarnæmi og fjölmenningarlegum áherslum í leikskólastarfi.

Fyrir hverja er námskeiðið og hvaða skilyrði þurfa að vera til staðar?

Námskeiðið er fyrir starfsfólk leikskóla sem hefur annað móðurmál en íslensku. Reynslan hefur sýnt fram á að farsælt sé að fleiri en einn þátttakandi sé frá hverjum leikskóla, en það er þó ekki skilyrði.  

Í öllum leikskólum þátttakenda verða að vera ákveðin skilyrði til staðar svo að námskeiðið verði sem farsælast og lærdómsríkast. Stuðningur og hvatning stjórnenda skiptir sköpum en einnig er gert ráð fyrir að hver og einn þátttakandi hafi mentor sem verður honum samferða í gegnum námskeiðið með ýmsu móti:

• Mentorar taki frá tíma reglulega til að ræða þemu námskeiðsins við þátttakendur.
• Mentorar og leikskólastjórar mæta á fræðslu- og kynningarfund í upphafi námskeiðs.
• Mentorar mæta í tvígang (í nóvember og mars) í lotur með þátttakendur – í 30 mínútur hvort skipti.  

Guðlaug Stella hjá Íslenskuþorpinu mun leita leiða til að heimsækja þátttakendur og mentora á vinnutíma með fræðslu og innleiðingu stuðningsvæns umhverfis á þeirra vinnustað. Þar verður rætt um markmiðasetningu, reynsluna af námskeiðinu og námskeiðið lagað að þörfum þátttakenda og leikskólanna sem þeir starfa á.  

Eins og í öðrum Menntafléttunámskeiðum eru þátttakendur hvattir til að vera í samráði við sína stjórnendur um þátttöku á námskeiðinu. Með því eru leikskólastjórar meðvitaðir um að styðja við þróun námssamfélags í leikskólanum. 

Hvar og hvernig fer námskeiðið fram?

Kennslan fer fram í 8 lotum á ZOOM,  skólaárið 2022-2023. Loturnar eru þannig uppbyggðar að allir þátttakendur mæta í tveggja klukkustunda lotu þar sem gestakennari kynnir þema lotunnar. Tveimur vikum seinna mæta þátttakendur í litlum hópum í eina klukkustund. Sjá nánari dagsetningar hér neðar.  

Nám þátttakenda fer þó aðallega fram í leikskólum þátttakenda í samtali þátttakenda og mentora um þemu námskeiðsins. Þátttakendur fá hagnýtar kveikjur í lotunum sem þeir vinna áfram með í daglegu leikskólastarfi.  

Í september verður fræðslu- og kynningarfundur fyrir skólastjórnendur og mentora þátttakenda. Nánari dagsetning verður tilkynnt síðar.  

Í september og janúar er einnig stefnt að því að Guðlaug Stella frá Íslenskuþorpinu heimsæki alla þátttakendur og mentora á vinnutíma.

Dag- og tímasetningar lota

2022
Miðvikudagur, 5. október kl. 15.00-17.00
Miðvikudagur, 9. nóvember kl. 15.00-17.00
Miðvikudagur, 8. desember kl. 15.00-17.00

2023
Miðvikudagur, 11. janúar kl. 15.00-17.00
Miðvikudagur 9. febrúar kl. 15.00-17.00
Miðvikudagur 8. mars kl. 15.00-17.00
Miðvikudagur 5. apríl kl. 15.00-17.00
Miðvikudagur 10. maí kl. 15.00-17.00

Þessu til viðbótar mæta þátttakendur sjö sinnum yfir námskeiðstímabilið, eina klukkustund í senn, í litlum hópum og fá einnig heimsókn frá mentorum. Sjá nánari útlistun neðar.

Umsjón og kennsla 

Guðlaug Stella Brynjólfsdóttir er umsjónarkennari námskeiðsins. Hún hefur áratuga reynslu af íslenskukennslu fullorðinna og hefur haldið fagtengd íslenskunámskeið fyrir starfsfólk bæði leik- og grunnskóla. Aðrir kennarar sem koma að kennslu námskeiðsins eru leikskólakennararnir Anna Sofia Wahlström, Birte Harksen, Danijela Zivojinovic, Fríða B. Jónsdóttir, Nichole Leigh Mosty og Vessela Dukova.

Þróunarhringurinn