„Mér hefur þótt námskeiðið mjög áhugavert, það hefur opnað augu mín fyrir svo margvíslegum leiðum í vinnu með leikskólabörnum.“
Námskeiðið er það þriðja og jafnframt síðasta í röð námskeiða um stærðfræði í leikskóla. Fyrri námskeið eru Stærðfræðin í leik barna og Stærðfræðin í umhverfi leikskólabarna. Hér er um að ræða sjálfstætt framhald sem byggir á þróunarhringjum 9-12. Markmið námskeiðsins er að styðja við þátttakendur, námssamfélög þeirra og teymi í að vinna með magnskilning leikskólabarna.
Skráningafrestur er til og með 1. september 2023
Á þessu námskeiði er sjónarhorninu beint sérstaklega að stærðfræðilegu viðfangsefnunum að mæla og telja, hvernig þau tengjast og hvað þau eiga sameiginlegt. Hugmyndir um gögn eru dregnar fram og fjallað um hvernig megi nýta þau til að hvetja börn til þátttöku í ólíkum aðstæðum. Einnig er fjallað um skráningar sem leiðir til starfsþróunar. Skráningum er til dæmis hægt að deila með forráðamönnum og samfélaginu í heild og stuðla þannig að aukinni meðvitund um aðstæður þar sem fengist er við stærðfræði. Lögð er áhersla á að þátttakendur fái yfirsýn yfir þau stærðfræðilegu viðfangsefni sem Allan J. Bishop kallaði að mæla og telja. Einnig eru þeir hvattir til að íhuga hvernig skráning getur stuðlað að sterkari tengslum á milli leikskóla og nærsamfélags.
Þátttakendur læra að nýta þróunarhring í fjórum skrefum, sem styður við samræður um innleiðingu breyttra starfshátta í námi og vinnu með börnum. Skrefin fjögur eru stigin í leikskólanum, á milli kennslulota í Menntafléttunni:
Skref A: Þátttakendur undirbúa sig með lestri eða áhorfi – og undirbúa spurningar.
Skref B: Þátttakendur funda með teymi sínu og gera áætlun um útfærslu í starfi.
Skref C: Þátttakendur og teymi þeirra framkvæmir og skrá hjá sér athuganir.
Skref D: Þátttakendur funda aftur með teyminu og ræða hvernig til tókst og hvernig nemendur brugðust við.
Við lok námskeiðs hafa þátttakendur kynnst
- leiðum til að efla námssamfélag sitt með umræðum um hvernig leikskólabörn geta aukið magnskilning sinn.
- Nýtt lesefni og hugmyndir að viðfangsefnum tengdum magnskilningi leikskólabarna með samstarfsfólki
- Notað hugtök tengd mælingum og talningu í starfi með leikskólabörnum
- Stutt leikskólabörn við að vinna að því að auka skilning sinn á mælingum og talningu
Fyrir hverja er námskeiðið og hvaða skilyrði þurfa að vera til staðar?
Námskeiðið er fyrir kennara á yngsta stigi grunnskóla. Reynslan hefur sýnt fram á að farsælt sé að fleiri en einn þátttakandi sé frá hverjum skóla en það er þó ekki skilyrði.
Eindregið er hvatt til þess að þátttakendur skrái sig í samráði við stjórnendur sína um þátttöku á námskeiðinu. Það tryggir að stjórnendur séu meðvitaðir um og samábyrgir fyrir að styðja við þróun námssamfélaga innan stofnana sinna. Hér er myndband sem lýsir mikilvægu hlutverki stjórnenda sem eiga þátttakendur á Menntafléttunámskeiðum og hér er texti sem lýsir þeim skilyrðum sem verða að vera til staðar í skóla þar sem námssamfélög kennara blómstra.
Hvar og hvernig fer námskeiðið fram?
Kennslan fer fram í sex rafrænum lotum, þrjár klukkustundir að lengd, skólaárið 2023-2024. Kennarar hafa hug á að vera með eina sex klukkustunda staðlotu í stað tveggja lota á vef á tímabilinu 15.-19. janúar. Nánari tímasetning staðlotunnar verður ákveðin í samráði við þátttakendur. Nám þátttakenda fer þó aðallega fram í skólum þátttakenda í samræðum teyma um þróun náms og kennslu. Þátttakendur fá hagnýtar kveikjur í lotunum sem þeir geta fléttað saman við daglegt starf. Þeir leiða svo samtal á teymisfundum í sínum skólum um hvernig gengur.
Í upphafi hverrar kennslulotu er farið yfir reynslu þátttakenda af því að nýta þróunarhringinn frá síðustu lotu (sjá mynd af þróunarhringnum hér fyrir neðan).
Dagsetningar lotanna
2023
Fimmtudagur, 7. september kl. 14.00-17.00
Fimmtudagur, 28. september kl. 14.00-17.00
Fimmtudagur, 9. nóvember kl. 14.00-17.00
2023
Fimmtudagur, 11. janúar kl. 14.00-17.00
Fimmtudagur, 29. febrúar kl. 14.00-17.00
Fimmtudagur, 2. maí kl. 14.00-17.00
Kennsla fer fram á fjarfundum og í einni staðlotu.
Þróunarhringurinn
Þróunarhringurinn er sóttur í smiðju Skolverket og nýttur með góðfúslegu leyfi.
Umsjón og kennsla
Auður Lilja Harðardóttir kennari við Ísaksskóla, Salóme Halldórsdóttir leikskólastjóri í Glaðheimum og Jónína Vala Kristinsdóttir dósent við Menntavísindsvið Háskóla Íslands.
Lota 1 Magnskilningur leikskólabarna
Lykilþættir námssamfélaga
Lota 2 Þróunarhringur
9 – Unnið með magn
Að leiða samtöl um breytta starfshætti – þróunarhringur
sem verkfæri
Lota 3 Þróunarhringur
10 – Mælingar
Að rýna í eigin starfshætti, pæla og skrá
Lota 4 Þróunarhringur 11 – Talning
Áskoranir námssamfélaga – leiðir til úrræða
Lota 5 Þróunarhringur
12 – Skráningar og starfsþróun
Hvernig gengur að leiða samtal í mínu
námsamfélagi um nám og kennslu?
Lota 6 Lokafundur
og samantekt
Næstu skref hjá mínu námssamfélagi
Í hnotskurn
- Lotur 6
- Quizzes 0
- Lotur: 6x3 klst.
- Hefst: All levels
- Lýkur: Maí 2024
- Gjöld: 0
- Gjöld: Mismunandi
-
1. lota / Magnskilningur leikskólabarna
Í fyrstu lotu námskeiðsins er farið yfir skipulag og efni námskeiðsins í grófum dráttum. Þátttakendur vinna verkefni sem varðar efni námskeiðsins. Rætt verður um hugtakið námssamfélag og hvað felst í því. Einnig verður rætt um hvað felst í því að vera leiðtogi meðal jafningja. Þátttakendur skoða vef námskeiðsins saman og kynnast þróunarhringnum.
-
2. lota / Þróunarhringur 9 - Unnið með magn
Í þessum þróunarhring er farið yfir nokkra eiginleika þess að telja og mæla og hvað þessi stærðfræðilegu viðfangsefni eiga sameiginlegt. Einnig er komið inn á hvernig skapa má aðstæður sem hvetja til ígrundunar um stærðfræðileg viðfangsefni með því að nýta nærumhverfi barnanna og á það við bæði hluti og mannlega þætti. Fjallað er um fjölmenningu og hvort og hvernig ákveðin gögn eða aðstæður geta höfðað til mismunandi barna. Einnig er hugað að því hvernig hægt er að virkja forráðamenn til samræðna við börnin um stærðfræðileg viðfangsefni.
-
3. lota / Þróunarhringur 10 - Mælingar
Þessi þróunarhringur fjallar um stærðfræðilega viðfangsefnið að mæla. Viðfangsefnið felur í sér að greina áhugaverða eiginleika þar sem hægt er að spyrja spurningarinnar „hversu mikið“? Til að byrja með er hægt að bera saman hluti og raða þeim með tilliti til eiginleikanna. Ef vilji er til þess að bera saman tvo hluti sem ekki eru á sama stað eða ekki eru aðgengilegir á sama tíma, þarf að nota hentugan þriðja hlut við samanburðinn. Stundum er hægt að nota þennan þriðja hlut til að bera saman við báða hina hlutina.
-
4. lota / Þróunarhringur 11 - Talning
Í þessum þróunarhring kynnist þið og dýpkið skilning ykkar á ólíkum hliðum stærðfræðilega viðfangsefnisins að telja sem er nátengt reikningi. Það sem fyrst kemur upp í hugann tengt viðfangsefninu í leikskólanum er talning á hlutum og vinna með talnaröðina. Enn og aftur er dregið fram hvernig mæling og talning eru hlutar af sömu heild.
-
5. lota / Þróunarhringur 12 - Skráningar og starfsþróun
Í þessum síðasta hluta námskeiðsins er farið vítt og breytt yfir efni allra tólf þróunarhringjanna sem leikskólanámskeiðin þrjú byggja á. Námskeiðin Stærðfræðin í leik barna, Stærðfræðin í umhverfi leikskólabarna og Magnskilningur leikskólabarna byggja öll á sex stærðfræðilegu viðfangsefnum Alan J. Bishop og eru tvö viðfangsefni tekin fyrir á hverju námskeiði. Nú eru þær grundvallarhugmyndir sem voru skoðaðar í fyrri þróunarhringjum skoðaðar aftur. Þessar hugmyndir eru þemu sem hafa gengið eins og rauður þráður í gegnum öll þrjú námskeiðin og í þessum hluta eru þær tengdar saman til að lýsa hvaða vægi þær hafa í skráningu á vinnu barnanna í leikskólanum.
-
6. lota / Lokafundur og samantekt
Þátttakendur segja frá hvernig gekk að vinna með efni síðasta þróunarhrings í leikskólunum. Litið verður yfir farinn veg, skoðað hvernig vinna vetrarins gekk í leikskólunum og dregið fram það sem vel var gert. Síðan verður litið fram á veginn og þátttakendur ígrunda hver verða næstu skref hjá þeim og þeirra námssamfélögum við að þróa áfram starfshætti í leikskólunum eftir að námskeiðinu lýkur.
